केन्द्रीय चलचित्र जाँच समितिका सदस्य ऋषि आचार्यको निर्देशनमा तयार भएको चलचित्र ‘द्रौपदी’ आउँदो चैतमा प्रदर्शन हुने भएको छ ।
निर्देशक आचार्यले डोल्पाको से फोक्सुन्डो लगायत विभिन्न रमणीयस्थलहरुमा छायाङ्कन गरिएको जानकारी दिनुभयो ।
उहाँले नाम धार्मिक सुनिए पनि यो महाभारतको पात्र नभई हाम्रो गाउँ र परिवेशकै एक महिला पात्रको कथा भएको बताउनुभयो । यसमा कथासँगै हाम्रै रमणीय र पर्यटकीयस्थललाई देख्न पाइने उहाँको भनाइ छ ।
निर्देशक आचार्यले नेपालीपन भएको आभास गराउने ‘द्रौपदी’ एक पृथक कथा रहेको बताउनुभयो । यस चलचित्रमा आश्विनी शाही, रवि ओड, जेल्सन अधिकारी, सुजाता तिमल्सिनाका साथमा निर्देशक आचार्यको अभिनय रहेको छ ।
आरवी मुभिजको ब्यानरमा निर्माण भएको चलचित्रमा सौरभ शर्मा बस्यालले पाश्र्वसङ्गीत, अनिल महर्जनले सम्भायन र मोहनकुमार झिल्लुले छायाङ्कन गर्नुभएको छ ।
