वर्तमान गठबन्धनमा कुनै समस्या नरहेकोले पूरै कार्यकाल टिक्ने देउवाको भनाइ

नेपाली कांग्रेसका सभापति शेरबहादुर देउवाले वर्तमान काँग्रेस- एमालेको गठबन्धन सरकार २०८४ सम्मै जाने बताउनुभएको छ ।
  
धनगढी विमानस्थलमा आज पत्रकारसँग कुरा गर्दै पूर्वप्रधानमन्त्रीसमेत रहनुभएका देउवाले वर्तमान गठबन्धनमा कुनै समस्या नरहेकाले यो पूरै कार्यकाल टिक्ने विश्वास व्यक्त गर्नुभयो । 

सहकारी प्रकरणका विषयमा सोधिएको प्रश्नमा देउवाले भन्नुभयो, “हाम्रा साथीलाई मुद्दा लाग्दा हामीले कहिल्यै होहल्ला गरेनौ, यो अदालती प्रक्रियामा छ ।” 
 
देउवा गृह जिल्ला डडेल्धुराका विभिन्न कार्यक्रममा सहभागी हुन जानेक्रममा आज धनगढी पुग्नुभएको हो । 

काँग्रेस सुदूरपश्चिम प्रदेश कार्यसमितिका प्रवक्ता सुरत रावतले सभापति देउवा पार्टीको जिल्ला कार्यसमिति बैठक, पालिका स्तरीय भेटघाट, उग्रतारामा लाग्ने मेला, गन्यापधुरा गाउँपालिकामा हुने कार्यक्रममा सहभागी हुने जानकारी दिनुभयो ।