राप्रपा नेता उद्धव थापा पार्टीबाट निष्कासित,कमल थापाको असहमति

राप्रपाले बाग्मती प्रदेश सभा संसदीय दलका नेता उद्वव थापालाई पार्टीबाट निष्कासित गरेको छ। पार्टीको निर्देशन बमोजिम नचलेको भन्दै अध्यक्ष राजेन्द्र लिङदेनले थापालाई कारबाही गरेको हो।

थापाले एमाले र नेकपाको सरकारलाई समर्थन गर्दै किरण थापालाई मतदान गरेका थिए। राप्रपाले समर्थन फिर्ता लिन गरेको आग्रहलाई उनले अस्वीकार गरेपछि कारबाहीमा परेका हुन् । अब सरकारमा सहभागी हुने पार्टीका अन्य सदस्यलाई पनि कारबाही गर्ने राप्रपाले जनाएको छ ।

यसैबीच, राप्रपा नेता कमल थापाले बागमती प्रदेश संसदीय दलका नेता उद्धव थापालाई गरिएको कारबाहीप्रति आपत्ति जनाएका छन् । बिहीबार बसेको राप्रपाको कार्यसम्पादन समितिले थापालाई जबरजस्ती कारबाही गरेको भन्दै उनले आफ्नो असहमति रहेको बताए । थापामाथि गरिएको कारबाहीको निर्णय पार्टीको विधि, विधान र पद्धति विपरीत हतारमा र जबरजस्ती लादिएको उनको तर्क थियो ।