अत्यधिक शीतलहर बढेपछि मधेसका विभिन्न स्थानमा नेपाली सेना र स्थानीय तहले चोकचोकमा आगो बाल्न दाउरा वितरण गर्न थालेका छन् ।
आज बिहानैदेखि चोहर्वास्थित नेपाली सेना नन्दाबक्स गणको सक्रियतामा सिरहाको नरहा गाउँपालिका–३ स्थित पुरानो चोहर्वा, गोलबजार नगरपालिका–४ देखि ६ सम्म तथा विष्णुपुर गाउँपालिका–१ मा दाउरा वितरण गरी चोकचोकमा आगो बालिएको छ । गणका सह सेनानी रेशमराज अधिकारीको कमान्डमा चिसो प्रभावित स्थानीय तथा यात्रुलाई दाउरा वितरण गरेको सेनाले जनाएको छ ।
चोकमा बालिएको आगोबाट उनीहरुले राहत महसुस गरेका छन् । सङ्कटको यस घडीमा अन्य निकायको उपस्थिति न्यून रहेको अवस्थामा नेपाली सेनाले दाउराको व्यवस्था गरी सहयोग गरेको स्थानीयले बताएका छन् ।
चिसोको प्रभाव बढ्दै गएपछि लहान नगरपालिकाले पनि बुधबारदेखि बजार क्षेत्रका विभिन्न चोकचोकमा दाउरा बाल्ने व्यवस्था सुरु गरेको छ । साथै, डिभिजन वन कार्यालय लहानले जाडो छल्न दाउरा व्यवस्थापनमा सहयोग गरिरहेको जनाएको छ ।
