विराटनगरस्थित जिल्ला कारागार मोरङका एक कैदीबन्दी गंगा लिम्बूको उपचारका क्रममा निधन भएको छ। स्वास्थ्यमा गम्भीर समस्या देखिएपछि मंगलबार राति कोशी अस्पतालमा भर्ना गरिएका पथरीशनिश्चरे नगरपालिका–४ का ५६ वर्षीय लिम्बूको बुधबार बिहान निधन भएको कारागारले जनाएको छ।
जिल्ला प्रशासन कार्यालय मोरङद्वारा अभद्र व्यवहार मुद्दामा गत भदौ ४ गते थुनामा चलान गरिएका लिम्बू विगत केही दिनयता श्वासप्रश्वाससम्बन्धी समस्या र खुट्टा सुन्निने पीडाबाट ग्रस्त थिए।
कारागारका एक अधिकृतका अनुसार उनलाई यसअघि पनि मंसिर १ गते उपचारका लागि अस्पताल लगिएको थियो। उपचारपछि कारागारमा ल्याइए पनि पुनः श्वास फेर्न गाह्रो हुने समस्या दोहोरिएपछि मंगलबार राति पुनः अस्पताल भर्ना गरिएको थियो।
अभद्र व्यवहार मुद्दामा १० हजार रुपैयाँ धरौटी तोकिएकै भए पनि लिम्बूको परिवारले रकम बुझाउन नसकेपछि उनी कारागारमै बसेका थिए।
