रामकुमारी झाँक्री भन्छिन्– बहुमतले माओवादीमा जाने निर्णय गरे पनि हामी सहभागी हुन्नौं

माओवादी केन्द्रसँगको पार्टी एकताबारे एकीकृत समाजवादीभित्र मतभिन्नता देखिएको छ। पार्टीका केही नेताहरूले माओवादी केन्द्रसँग हतारमा पार्टी एकता गर्न नहुने धारणा राखेका छन् ।

नेतृ रामकुमारी झाँक्रीले पार्टीभित्र बहुमतको आधारमा नेकपा (माओवादी केन्द्र) सँग एकता गर्ने निर्णय भए पनि आफूहरू उक्त प्रक्रियामा सहभागी नहुने स्पष्ट गरेकी छन् ।

पार्टी केन्द्रीय कार्यालयमा शुक्रबार सञ्चारकर्मीहरूसँग कुरा गर्दै झाँक्रीले माओवादी केन्द्रसँग हुने प्रक्रिया वाम एकता नभई ‘मर्जर’ (पार्टी विलय) को दिशामा गएको बताइन् । उनका अनुसार, यस्तो मर्जरले वामपन्थी आन्दोलनलाई सुदृढ गर्नुभन्दा पनि पार्टीभित्र तानाशाही प्रवृत्तिलाई बलियो बनाउने खतरा बढाउँछ ।

उनका अनुसार, अहिलेको एकता प्रक्रियामा केही नेताहरूको व्यक्तिगत एजेन्डा हाबी भएको कारणले आफू र केही सहकर्मीहरू सहभागी नहुने निर्णयमा पुगेका छन् । सम्मानित नेता झलनाथ खनाल,घनश्याम भुसाल लगायतका नेताहरु तत्काल माओवादीसँग एकता गर्ने पक्षमा देखिदैनन् ।

यसैबीच,एकीकृत समाजवादीका स्थायी कमिटी सदस्य विरोध खतिवडाले भने माओवादी केन्द्रसँग छिट्टै पार्टी एकता हुने बताए। उनका अनुसार, यसपटकको एकता विगतका कमजोरीहरू चिर्नेगरी अघि बढाइनेछ र वाम आन्दोलनलाई नयाँ दिशातर्फ लैजाने लक्ष्य रहेको छ ।