बुटवल, कात्तिक १४ :
नेकपा (मसाल)का महामन्त्री मोहनविक्रम सिंहले जेनजी आन्दोलनमा भएको दमनको निष्पक्ष छानबिन गरी दोषीलाई कारबाही हुनुपर्ने बताएका छन् ।
प्रगतिशील पत्रकार संघले शुक्रबार बुटवलमा गरेको पत्रकार सम्मेलनमा सिंहले सरकारले शान्तिपूर्ण आन्दोलनमाथि गोली चलाएर नरसंहार गरेको भन्दै त्यसको निष्पक्ष छानबिन र कारबाही आवश्यक रहेको बताए ।
उनले जेनजी आन्दोलन नेतृत्वविहीन हुँदा त्यसले अर्कै रुप लिएको पनि बताए । जेनजी आन्दोलनपछि गरिएको संसद विघटन असंवैधानिक भएको भन्दै सिंहले अदालतले पुन:स्थापनाको निर्णय गर्ने विश्वास व्यक्त गरे ।
उनले संसद पुन:स्थापना नभएर निर्वाचन हुने वातावरण बने आफूहरुको समर्थन हुने पनि बताए ।उनले प्रतिनिधिसभा विघटन, अन्तरिम सरकारको गठन र देशभर देखिएका ध्वंसात्मक घटनाहरूले देशलाई गहिरो संकटमा धकेलेको समेत उल्लेख गरे ।
