प्रस्तावित प्रधानन्यायाधीश राउत उपर १० दिनभित्र उजुरी दिन आह्वान 

प्रधानन्यायाधीशमा सिफारिस प्रकाशमान सिंह राउत र दुई देशका प्रस्तावित राजदूत उपर कुनै उजुरी भएमा १० दिनभित्र पेस गर्न आव्हान गरिएको छ । 

संसदीय सुनुवाइ समितिको सचिवालयले आज एक सूचना जारी गर्दै समितिको बैठकको निर्णय बमोजिम संवैधानिक परिषद्बाट प्रधानन्यायाधीशमा सिफारिस प्रकाशमान सिंह राउत, अस्ट्रेलियाका लागि प्रस्तावित राजदूत चित्रलेखा यादव र बेल्जियमका लागि प्रस्तावित राजदूत सेवा लम्साल उपर सार्वजनिक उजुरी आह्वान गरेको हो । 

हिजो बसेको समिति बैठकमा समिति सभापति ईश्वरीदेवी न्यौपानेले सरकारी सञ्चार माध्यम र विद्युतीय सञ्चार माध्यम मार्फत उजुरी आह्वान गर्ने प्रस्ताव प्रस्तुत गर्नुभएको थियो। 

प्रस्ताव पारित भएसँगै समिति सचिवालयले सूचना प्रकाशित गर्दै उजुरी आह्वान गरेको हो ।