जेनजी युवा प्रतिनिधिद्वारा ९ सदस्यी वार्ता टोली गठन [नामसहित]

जेनजी युवाहरुको एक समूहले सरकारसँग संवाद र सम्झौताको पहल थाल्दै नौ सदस्यीय वार्ता टोली गठन गरेको छ। टोलीमा मिराज ढुंगाना, पुरुषोत्तम यादव,प्रवेश दाहाल, बब्लु गुप्ता, टिकाराम लिम्बु, योग्यता भण्डारी, जेम्स कार्की, कासिफ महम्मद मिया र अर्पित कुवर रहेका छन्।

यद्यपि टोलीमा रक्षा बमको नाम पनि उल्लेख गरिएको छ, उनले भने आफ्नो संलग्नता अस्वीकार गर्दै हस्ताक्षर नगरेको प्रष्ट पारेकी छन्।

टोलीले आन्दोलनरत पक्षको तर्फबाट प्रतिनिधित्व गर्दै सरकारसँग वृहत् राजनीतिक सम्झौता गर्ने तयारी गरेको छ। नेपालका राष्ट्रपति र प्रधानमन्त्रीको रोहबरमा उक्त सम्झौता गर्नेसम्मको म्याण्डेट टोलीलाई दिइएको छ। साथै, सम्झौतामा समावेश हुने एजेन्डा तय गरेर राष्ट्रपतिसमक्ष पेस गर्ने जिम्मेवारी पनि सोही टोलीले पाएको छ।

गत भदौ २३ र २४ गते जेनजी युवाको अगुवाइमा राजधानीलगायतका विभिन्न स्थानमा प्रदर्शन र आन्दोलन भएको थियो। त्यसकै दबाबमा तत्कालीन प्रधानमन्त्री केपी शर्मा ओलीले राजीनामा दिएका थिए। त्यसपछिका राजनीतिक घटनाक्रममा राष्ट्रपति रामचन्द्र पौडेलले अन्तरिम सरकार गठन गरी आगामी फागुन २१ गते आम निर्वाचनको घोषणा गरेका छन्।

जेनजी आन्दोलनले मुलुकको राजनीतिमा व्यापक प्रभाव पारेको भए पनि हालसम्म सरकार र आन्दोलनरत पक्षबीच कुनै औपचारिक सम्झौता भएको थिएन। सोही अभाव पूर्ति गर्न युवाहरुको समूहले वार्ता टोली गठन गरेर गृहकार्य अघि बढाएको हो।