जेनजी आक्रमण : देउवाको टाउकोमा १२ टाँका

नेपाली कांग्रेसका सभापति शेरबहादुर देउवाको टाउकोमा १२ वटा टाँका लगाइएको छ। भदौ २४ गते जेनजी आन्दोलनका क्रममा आफ्नै निवास बुढानीलकण्ठमा आक्रमणमा परेका देउवाको टाउकोमा गम्भीर चोट लागेको कांग्रेस प्रचार विभाग प्रमुख मीनबहादुर विश्वकर्माले जानकारी दिएका छन्।

शुक्रबार पार्टीको कार्यसम्पादन समिति बैठकपछि बोल्दै विश्वकर्माले भने, ‘सभापति देउवा र केन्द्रीय सदस्य आरजु देउवा सामान्य अवस्थामा फर्किँदै हुनुहुन्छ। उहाँको गर्धनभन्दा माथि टाउकोमा गम्भीर चोट लागेको छ, जहाँ १२ वटा टाँका लगाइएको छ। अहिले स्वास्थ्यमा सुधार हुँदैछ।’

चिकित्सकहरूका अनुसार धारिलो हतियार प्रहारबाट देउवाको टाउकोमा चोट लागेको हो। तर, कसले कस्तो हतियार प्रयोग गरेर हमला गर्‍यो भन्ने कुरा अझै खुल्न नसकेको विश्वकर्माले बताए।

जेनजी आन्दोलन हिंसात्मक बन्दै जाँदा आन्दोलनकारीहरूले देउवाको निजी निवासमा आगजनी र तोडफोड गरेका थिए। सो क्रममा घरमै रहेका देउवा दम्पतीमाथि हातपात र कुटपिट भएको थियो। आक्रमणपछि दुबै जना गम्भीर रूपमा घाइते भई रगताम्य भएका थिए।

नेपाली कांग्रेसले सभापति देउवा र उनकी पत्नीमाथि भएको आक्रमणलाई अमानवीय र बर्बर भन्दै कडा शब्दमा निन्दा गरेको छ।