शंकर पोखरेलको प्रस्ताव- नयाँ पुस्ताको विश्वास जित्ने गरी पार्टी गतिविधि अघि बढाऔं

नेकपा एमालेका महासचिव शंकर पोखरेलले पार्टी गतिविधि नयाँ पुस्ताको विश्वास जित्ने खालको हुनुपर्ने बताएका छन्। सामाजिक सञ्जालमार्फत उनले नयाँ पुस्ताको आकांक्षा, माग र बलिदानप्रति सम्मान जनाउनुपर्नेमा जोड दिएका छन्।

उनले नयाँ पुस्ताको नाममा भइरहेका प्रतिगमनकारी प्रयास र विध्वंसकारी गतिविधिको विरोध गर्नुपर्ने धारणा व्यक्त गरेका छन्।

‘नयाँ पुस्ताको आकांक्षा, माग र बलिदानको सम्मान गरौं। त्यसको आवरणमा गर्न खोजिएका प्रतिगमनकारी हर्कत र विध्वंसको विरोध गरौं,’ पोखरेलले भनेका छन्, ‘नयाँ पुस्ताको विश्वास जित्ने गरी पार्टी गतिविधि अघि बढाऔं। जनतासँगको सम्बन्धलाई जीवन्त र घनिष्ठ बनाऔं।’

महासचिव पोखरेलले पार्टीभित्रको आन्तरिक एकतालाई सुदृढ बनाउने, कार्यकर्ताको मनोबल उच्च राख्ने र जनपक्षीय जीवनशैली तथा आचरण अपनाउनुपर्ने कुरामा पनि जोड दिएका छन्।

उनले संविधान र संघीय लोकतान्त्रिक गणतन्त्रको संरक्षणका लागि सबैलाई जागरूक बनाउने आवश्यकता औंल्याउँदै लोकतान्त्रिक शक्तिहरूसँगको सम्बन्ध र सहकार्यलाई अझ बलियो बनाउनु पर्ने बताएका छन्।