नेपाल पत्रकार महासंघको केन्द्रीय कार्यालयमा फेरि तालाबन्दी भएको छ ।
महासंघले निर्वाचन कार्यतालिका अनुसार अस्ति २९ गते साँझ प्रकाशित गरेको नामावलीमा गैर पत्रकारहरुको नाम समावेश गरिएको भन्दै नेपाल प्रेस युनियन जुम्ला शाखाका अध्यक्ष प्रकाश उपाध्यायले हिजो ताला लगाएका हुन् ।
क्रियाशिल पत्रकारहरुको सदस्यता कायम गरी महासंघको निर्वाचनलाई मर्यादित बनाउन माग गर्दै उनले ताला लगाएका हुन् । सदस्यता वितरण एकलौटी ढंगले वितरण गरेको भन्दै गैर पत्रकारको सदस्यता खारेजीको समेत माग गरेका छन् ।
महासंघकै ५२ जिल्लाका शाखा अध्यक्षहरुले पनि आज संयुक्त विज्ञप्ति जारी गर्दै एक्यवद्धता जनाएका छन् । महासंघको विधानअनुसार सदस्यता वितरण र नवीकरण शाखाको सिफारिस अनुसार प्रदेशले अनुमोदन गरी केन्द्रले अभिलेखिकरण गर्नुपर्ने माग शाखा अध्यक्षहरुको रहेको छ ।
यस अघि पनि सदस्यता विवादका कारण महासंघमा ताला लगाईएकोमा सहमति पछि ताला खोलिएको थियो ।
महासंघका अध्यक्ष विपुल पोख्रेलले अध्यक्ष पदबाट राजिनामा दिईसकेका छन् ।
अहिले महासंघको कार्यवाहक अध्यक्षको रुपमा वरिष्ठ उपाध्यक्ष रमेश विष्टले जम्मेवारी सम्हालेका छन् ।
केन्द्रीय निर्वाचन समितिले असोज १२ गतेका लागि महासङ्घको निर्वाचनको मिति तोकिसकेको छ र कार्यतालिका समेत सार्वजनिक गरिसकेको छ ।
