चालु आवको पहिलो महिनामा सरकारको आम्दानी ८५ अर्ब, खर्च ४६ अर्ब

चालु आर्थिक वर्ष २०८२/८३ को पहिलो महिना सरकारले रू ८५ अर्ब १९ करोड रुपैयाँ आम्दानी गर्दा रू ४६ अर्ब ३० करोड रुपैयाँखर्च गरेको छ । महालेखा नियन्त्रक कार्यालयको तथ्याङ्कअनुसार चालु आवको पहिलो महिना वार्षिक लक्ष्यको पाँच दशमलव ५६ प्रतिशत आम्दानी र दुई दशमलव ३६ प्रतिशत खर्च भएको हो ।

सरकारले चालु आवमा १५ खर्ब ३३ अर्ब ४४ करोड रुपैयाँ ६९ लाख राजस्व उठाउने लक्ष्य राखेको छ । साउन मसान्तसम्ममा कर राजस्वबाट  ८० अर्ब ६७ करोडभन्दा बढी अर्थात् वार्षिक लक्ष्यको छ दशमलव ०९ प्रतिशत र गैरकर राजस्वबाट  तीन अर्ब ७९ करोड रुपैयाँ ५० लाख अर्थात् वार्षिक लक्ष्यको दुई दशमलव ४६ प्रतिशत सङ्कलन भएको विवरणमा उल्लेख छ । 
यस्तै, वैदेशिक अनुदानबाट  ४२ करोड रुपैयाँ १९ लाख र अन्य प्राप्तिबाट रू ३० करोड रुपैयाँ ८९ लाख राजस्व सरकारी खातामा जम्मा भएको छ । यस वर्ष  १३ खर्ब २५ अर्ब ५८ करोड रुपैयाँ ३९ लाख कर राजस्व,  एक खर्ब ५४ अर्ब ४१ करोड रुपैयाँ ६१ लाख गैरकर राजस्व र  ५३ अर्ब ४४ करोड रुपैयाँ ६९ लाख वैदेशिक अनुदान उठाउने सरकारको लक्ष्य छ ।

चालु आवका लागि  १९ खर्ब ६४ अर्ब ११ करोड रुपैयाँ बराबरको बजेट ल्याइएकामा साउन मसान्तसम्ममा रू ४६ अर्ब ३० करोड रुपैयाँ ६१ लाख बराबर खर्च भएको छ । चालुतर्फ  ११ खर्ब ८० अर्ब ९८ करोड रुपैयाँ बजेट विनियोजन भएकामा हालसम्म एक दशमलव ५६ प्रतिशत अर्थात्  १८ अर्ब ४७ करोड रुपैयाँ ९८ लाख बराबर खर्च भएको महालेखाले जनाएको छ ।

यस्तै, पुँजीगत शीर्षकमा रू चार खर्ब सात अर्ब ८८ करोड रुपैयाँ ८० लाख  विनियोजन भएकामा शून्य दशमलव १८ प्रतिशत अर्थात्  ७२ करोड रुपैयाँ ६३ लाख मात्रै खर्च भएको छ । पहिलो महिनामा सबैभन्दा धेरै खर्च वित्तीय व्यवस्था शीर्षकमा भएको छ । चालु आवका लागि वित्तीय व्यवस्था शीर्षकमा रू तीन खर्ब ७५ अर्ब २४ करोड रुपैयाँ २० लाख बराबर विनियोजन भएकामा साउन मसान्तसम्म सात दशमलव २२ प्रतिशत अर्थात्  २७ अर्ब १० करोड रुपैयाँ खर्च भएको छ ।