नेपाली कांग्रेसका वर्तमान र पूर्वपदाधिकारीहरूले पार्टी सभापति शेरबहादुर देउवालाई भेटेर चाक्सीबारी बैठकको निर्णय सुनाएका छन् ।
मंगलबार बुढानीलकण्ठस्थित सभापति देउवाको निवासमा पुगेर नेताहरुले सातबुँदे सहमतिमा उल्लेखित विषयहरूसंविधान संशोधन, संघीयताको कार्यान्वयन, समावेशिता तथा गठबन्धनको दीर्घकालीन नीतिबारे गम्भीर छलफल आवश्यक रहेको भन्दै सभापतिको ध्यानाकर्षण गराएका छन् ।
साथै उनीहरूले सरकार सञ्चालनमा सहमति अनुरूपको कार्यान्वयन नदेखिएको बताउँदै गठबन्धनको मर्म अनुसार नीति तथा कार्यक्रम निर्धारण गर्नुपर्ने माग राखे।
भेटपछि पत्रकारहरूसँग कुरा गर्दै पूर्वउपसभापति गोपालमान श्रेष्ठले महत्त्वपूर्ण र रणनीतिक निर्णयहरू गर्दा आफूहरूलाई बेवास्ता नगरियोस् भन्ने आग्रह सभापतिसमक्ष राखिएको र देउवाले त्यसलाई सकारात्मक रूपमा लिएको जानकारी दिए।
नेता शेखर कोइरालाले प्रमुख प्रतिपक्षी माओवादी केन्द्रका अध्यक्ष पुष्पकमल दाहाल ‘प्रचण्ड’ र एमाले नेतृ विद्या भण्डारीसँग गरेको भेटको विषयमा पनि छलफल भएको बताइएको छ।
सोमबार चाक्सीबारीमा बसेको कांग्रेसका वर्तमान र पूर्वपदाधिकारीको बैठकले एमालेसँग भएको सातबुँदे सहमतिअनुसार सरकारको कामकारबाही अघि नबढेको निष्कर्ष निकालेको थियो ।
भेटमा उपप्रधानमन्त्री एवं कांग्रेस नेता प्रकाशमान सिंह, पूर्वउपसभापति गोपालमान श्रेष्ठ, विजयकुमार गच्छदार, पूर्वमहामन्त्री कृष्णप्रसाद सिटौला र प्रवक्ता डा. प्रकाशशरण महत सहभागी थिए।
