ताप्लेजुङमा पहिरो : घर पुरिँदा एकै परिवारका ५ घाइते, एकजना सिकिस्त

ताप्लेजुङमा पहिरोले घर पुरिँदा एकै परिवारका पाँचजना घाइते भएका छन् । एकजनाको अवस्था सिकिस्त छ ।

ताप्लेजुङको सिदिङबा गाउँपालिका ३, खिर्लाबोटेमा गएराति करिब १ बजेतिर आएको पहिरोले हस्तबहादुर कटुवालको घर पुरिएको हो ।

पहिरोले हस्तबहादुरकी ६० वर्षीया पत्नी ठगमाया सख्त घाइते भएको जिल्ला प्रहरी कार्यालय ताप्लेजुङले जनाएको छ । पहिरोमा परेर घाइते भएका हस्तबहादुर, उनका जेठा छोरा जगत, बुहारी सरस्वता र छोरी सम्झनाको अवस्था भने सामान्य छ ।