रामहरिलाई डोलप्रसादको जवाफ- सुमिरे टुर एन्ड ट्राभल्स मेरै हो, नफर्केको एकजना देखाउन चुनौती

राष्ट्रिय स्वतन्त्र पार्टी (रास्वपा) का उपसभापति डोलप्रसाद अर्यालले ‘सुमिरे टुर एन्ड ट्राभल्स’ आफ्नै कम्पनी भएको स्वीकार गर्दै त्यस सम्बन्धमा सांसद रामहरि खतिवडाद्वारा उठाइएका आरोपहरू अस्वीकार गरेका छन् ।

प्रतिनिधिसभाको आइतबारको बैठकमा अर्यालले आफ्नो कम्पनीमार्फत भिजिट भिसामा गएकाहरू फर्किन नसकेको कुनै प्रमाण नभएको दाबी गरे । उनले कम्पनीमार्फत मानव तस्करी भएको भन्ने आरोपलाई निराधार भन्दै संसद्को रेकर्डबाट हटाउन माग गरे ।

शनिबारको संसद् बैठकमा नेपाली कांग्रेसका सांसद रामहरि खतिवडाले ‘सुमिरे टुर एन्ड ट्राभल्स’ विगत १० वर्षदेखि भिजिट भिसाको नाममा नेपालीलाई जापान पठाई अर्बौं रुपैयाँ कमाएको र त्यसैको आधारमा संसद्मा सांसद किनेर प्रवेश गरिएको आरोप लगाएका थिए ।

त्यसको जवाफमा अर्यालले आफू चोरेर होइन, मिहिनेत गरेर खाने मान्छे भएको प्रस्ट पार्दै भने, ‘मेरो समय ठिकै चलेको छ, अरुको घडी बिग्रेको छ भने म के भनूँ ?’

अर्यालले प्रश्न गरे, ‘के मेरो कम्पनीबाट एक जना पनि मान्छे विदेश गएको छ र फर्किएको छैन ? छ भने प्रमाण पेस गरियोस्, छैन भने लाञ्छनायुक्त अभिव्यक्ति हटाइयोस् ।’

उनले ३२ दिनदेखि संसद्‌मा उठिरहेको भिजिट भिसा प्रकरणलाई अन्यत्र मोड्न यस्तो आरोप लगाइएको आरोप पनि लगाए । अर्यालले आफूहरूको आन्दोलन जारी रहने र भिजिट भिसाको नाममा भइरहेको अवैध कार्यविरुद्ध आवाज उठाइरहने चेतावनी दिए।