सुनसरीको रामधुनी नगरपालिका ७, चतरा-कान्छी सडकखण्डमा मोटरसाइकल दुर्घटना हुँदा बाबुछोरासहित तीनजनाको मृत्यु भएको छ ।
दुर्घटनामा अन्य दुईजना सख्त घाइते भएको प्रहरीले जनाएको छ ।
गएराति चतरा-कान्छी चोकबाट कालाबन्जारतर्फ जाँदै गरेको को.३३प ९६०५ नम्बरको मोटरसाइकल र विपरीत दिशाबाट आउँदै गरेको प्रदेश १-०२-०५६प ५८६४ नम्बरको मोटरसाइकल ठक्कर खाँदा बाबुछोरासहित तीन जनाको मृत्यु भएको हो ।
मृत्यु हुनेमा ३४ वर्षीय इनर्चन चौधरी, उनका नौ वर्षीय छोरा प्रनिष र अर्का मोटरसाइकल चालक ५१ वर्षीय विन्दु यादव छन् ।
जिल्ला प्रहरी कार्यालयका अनुसार उनीहरूलाई घाइते अवस्थामा धरानस्थित बीपी कोइराला स्वास्थ्य विज्ञान प्रतिष्ठानमा लगिएको थियो । उपचारका क्रममा सबैको मृत्यु भएको हो ।
दुर्घटनामा इनर्चन चौधरीकी ३२ वर्षीया पत्नी प्रतीक्षा र विन्दु यादवसँग चढेकी इटहरी ७ की ३६ वर्षीय रमेश चौधरी सख्त घाइते भएका छन् । उनीहरूको धरानस्थित प्रतिष्ठानमा उपचार भइरहेको प्रहरीले जनाएको छ । -रासस
