एक सय ११ औँ बिपी जयन्तीको अवसरमा नेपाली काँग्रेस रूपन्देहीले आयोजना गरेको खुला सडक दौड प्रतियोगितामा इटहरीका धनु मानन्धरले प्रथम स्थान प्राप्त गरेका छन् ।
पाँच किलोमिटरको प्रतियोगितामा उनले १५ मिनेट ५२ सेकेन्डमा उक्त दूरी पूरा गर्दै प्रथम भएका हुन्।
यसैगरी रूपन्देही गैडहवाका उमेश बरईले १६ मिनेट चार सेकेन्ड र रूपन्देही सियारीका अजय पाण्डेले १६ मिनेट २५ सेकेन्डमा उक्त दूरी पूरा गर्दै क्रमशः दोस्रो र तेस्रो भए ।
गौतमबुद्ध अन्तर्राष्ट्रिय विमानस्थल अगाडिबाट सुरु भएको दौड लुम्बिनी रोड, नारायणपथ हुँदै मिलनचोकमा समापन भएको थियो ।
यसैगरी प्रतियोगिताको महिलातर्फ भने नेपाली सेनाको वर्चस्व रह्यो । महिलातर्फ दोस्रो बाहेक सबै पुरस्कार सेनाले हात पारेको छ ।
कालीभक्ती गणका सरिताकुमारी बस्नेतले पाँच किलोमिटरको दूरी २१ मिनेट २९. ४४ सेकेन्डमा पूरा गर्दै प्रथम भइन भने कुसुम ठगुन्नाले २१ मिनेट २९. ७३ सेकेन्ड र विपना केसी २१ मिनेट ४४ सेकेन्डमा पूरा गर्दै क्रमशः दोस्रो र तेस्रो भए ।
पुरुषतर्फ मनोज केवट र महिलातर्फ विन्दु थापाले सान्त्वना पुरस्कार प्राप्त गरेका छन् ।
प्रतियोगितामा प्रथम हुनेलाई १० हजार, प्रमाणपत्र, दोस्रोलाई नगद पाँच हजार सहित प्रमाणपत्र र तेस्रो हुनेलाई तीन हजार नगदसहित प्रमाणपत्र र सान्त्वना हुनेलाई एक हजार पाँच नगद सहित प्रमाणपत्र प्रदान गरिएको प्रतियोगिता संयोजक ओमकुमार श्रेष्ठले जानकारी दिनुभयो ।
प्रतियोगितामा नेपाली सेना, सशस्त्र प्रहरी बल, नेपाल प्रहरी र सर्वसाधारण गरी चार सय ५० जना बढी धावकको सहभागिता रहेको रहेको थियो ।
