ललितपुर, भदौ २४ :
नौ वर्षअघिको भूकम्पले भग्नावशेष बनाएको विश्व सम्पदा सूचीमा सूचीकृत पाटन दरबार क्षेत्रमा अवस्थित देगु तलेजु मन्दिरको पुनः निर्माण सम्पन्न भएको छ ।
भूकम्पपछि जीर्ण अवस्थामा रहेको ऐतिहासिक देगु तलेजु मन्दिरको बाहिरी भागको काम सकिएको र दोस्रो चरणमा भित्रको काम चलिरहेको पाटन स्मारक संरक्षण तथा दरबार हेरचाह कार्यालयका प्रमुख लीला पाठकले जानकारी दिनुभयो ।
भित्री भागको काम पूरा भएपछि क्षमापूजा गरेर उद्घाटन हुने उहाँले जानकारी दिनुभयो । मल्लकालीन मन्दिर मौलिक शैलीमा पुनः निर्माण गरिएको छ ।
ललितपुरको सबैभन्दा ठूलो र अग्लो मन्दिरका रूपमा परिचित देगु तलेजु मन्दिर पुनःनिर्माणका लागि जापान सरकारले १३ करोड सहयोग गरेको हो ।
ललितपुरका अधिकांश सम्पदाको पुनः निर्माण पूरा भएको छ भने केही निर्माणाधीन छन् ।
