विपक्षी दलको अडान : छानबिन समिति बनाउने लिखित प्रतिबद्धता भए संसद् चल्न दिने

भिजिट भिसा प्रकरणमा गृहमन्त्रीमाथि छानबिन गर्न संसदीय समिति गठन गर्ने लिखित प्रतिबद्धता सत्ता पक्षले गरे संसद् सञ्चालनमा सहमति हुनसक्ने विपक्षी दलहरूले बताएका छन्।

दिउँसो बसेको विपक्षी गठबन्धनको बैठकले संसद् अवरोध खोल्ने सन्दर्भमा छानबिन समिति गठनको विषयमा सत्ता पक्षबाट स्पष्ट र लिखित प्रतिबद्धता आउनुपर्ने निष्कर्ष निकालेको हो।

माओवादी केन्द्रका प्रमुख सचेतक हितराज पाण्डेले छानबिन समिति बनाउन सत्तापक्ष तयार भए संसद् चल्न सक्ने बताए।

प्रतिपक्षी दलहरू तत्काल समिति नबनाइए पनि पछि गठन गर्ने लिखित प्रतिबद्धता भए संसद् चल्न सक्नेमा सहमत छन्। विपक्षी दलहरूको प्रस्तावका आधारमा सभामुखले सत्ता गठबन्धनका शीर्ष नेताहरूलाई जानकारी गराइसकेका छन्।

यसै सन्दर्भमा सत्ता पक्षको धारणा तय गर्न नेपाली कांग्रेस र एमालेबीच छुट्टै बैठक बसेको छ। बैठकमा विपक्षीको मागबारे थप छलफल भइरहेको जनाइएको छ।

यसअघि माओवादी केन्द्रका अध्यक्ष तथा प्रधानमन्त्री पुष्पकमल दाहाल ‘प्रचण्ड’ ले विपक्षी दलहरूको निष्कर्ष सभामुखलाई सुनाइसकेका थिए। अहिले सत्ता र विपक्ष दुबैतर्फबाट संवादको प्रयास तीव्र भइरहेको छ।