ताप्लेजुङ, भदौ २० :
प्रतिकूल मौसमका कारण तीन महिना बढी समय बन्द रहेको सुकेटार विमानस्थलमा पुनः उडान सुरुआत भएको छ ।
नेपाल वायु सेवा निगमले आज उडान सुरु गरेको जनाएको हो ।
निगमले हाललाई भदौ ३० गतेसम्म हप्तामा एक दिन बुधबार मात्रै उडान तालिका राखेको छ ।
मौसम खुला भएमा उडान तालिका थप्ने तयारी पनि गरिरहेको निगमको स्टेसन कार्यालयका प्रमुख नारायणकुमार कार्कीले जानकारी दिनुभयो ।
बर्खायाम सुरु भएपछि जेठ ११ गतेदेखि सुकेटारमा उडान बन्द भएको थियो ।
उडान पुनः सञ्चालन भएसँगै दसैँ, तिहारजस्ता चाडपर्व र पर्यटकीय मौसमको नजिकिँदो समयमा यात्रुलाई सुविधा हुने भएको छ ।
