मन्त्री थापा बर्खास्त

धनगढी,साउन १३: सुदूरपश्चिम प्रदेशका मुख्यमन्त्री दीर्घबहादुर सोडारीले भूमि व्यवस्था, कृषि तथा सहकारीमन्त्री टीका थापालाई बर्खास्त गर्नुभएको छ ।

आफ्नो निर्देशन विपरीत प्रदेश सभाको बैठकमा सहभागी भएको भन्दै मुख्यमन्त्री सोडारीले थापालाई बर्खास्त गर्नुभएको हो ।

मुख्यमन्त्रीका स्वकीय सचिव दीर्घ जोशीले थापालाई पदबाट बर्खास्त गरिएको बताउनुभयो । थापा प्रदेश प्रमुखले आह्वान गरेको प्रदेश सभाको विशेष अधिवेशनको बैठकमा सहभागी हुनुभएको थियो ।

८ साउनमा बसेको पहिलो र आइतबार बसेको दोस्रो बैठकमा सहभागी भएपछि थापालाई मन्त्रीबाट बर्खास्त गरिएको हो ।

एमालेले २० असारमा समर्थन फिर्ता लिएपछि मुख्यमन्त्री सोडारीले चालु आर्थिक वर्ष २०८१/८२ को बजेट अध्यादेशमार्फत ल्याउन खोज्नुभएको थियो ।

तर प्रदेश प्रमुख नजिर मियाँले २९ असारमा सरकारले सिफारिस गरेको बजेट अधिवेशन अन्त्य गर्ने सम्बन्धी पत्र ३ साउनमा मात्र कार्यान्वयन गर्नुभएको थियो । कांग्रेस र एमालेका एक चौथाइभन्दा बढी प्रदेश सभा सदस्यको मागबमोजिम भोलिपल्ट विशेष अधिवेशन आह्वान गरिएको थियो ।

प्रदेश प्रमुखको यो कदमले मुख्यमन्त्री सोडारीको अध्यादेशमार्फत बजेट ल्याउने विकल्प बन्द भएको थियो । सरकारले बजेट ल्याउन नसकेपछि सुदूरपश्चिम प्रदेश साउन १ गतेदेखि बजेट शून्यतामा छ ।