गृहमन्त्री रमेश लेखकको बर्खास्तीको मागसहित सर्वोच्च अदालतमा रिट निवेदन परेको छ ।
अधिवक्ता मधु चौलागाईंले गृहमन्त्री लेखकलाई पदमुक्त गर्न माग गर्दै सर्वोच्चमा रिट पेस गरेकी हुन् । यद्यपि रिट दर्ता हुने/नहुनेबारे आइतबार मात्र निर्णय हुने सर्वोच्चका प्रवक्ता अच्युत कुइँकेलले जानकारी दिए ।
पैसा खाएर भिजिट भिसा दिने प्रकरणमा गृहमन्त्रीको सचिवालयका व्यक्तिहरू नै संलग्न भएको भन्दै छानबिनको माग आएका बेला गृहमन्त्री लेखकको बर्खास्तीको माग गर्दै रिट परेको हो ।
दैनिक ५ लाखदेखि १ करोडसम्म उठाइएको भिजिट भिसा प्रकरणमा गृहमन्त्रीको सचिवालयकै सदस्य जोडिएका छन् । गृहमन्त्री लेखकले गत असोज ३० गते विमानस्थल अध्यागमन कार्यालय पठाइएका सहसचिव तीर्थ भट्टराई पनि अख्तियार दुरुपयोग अनुसन्धान आयोगको छानबिनमा तानिइसकेका छन् ।
शुक्रबार मात्रै गृहमन्त्री लेखकलाई बर्खास्ती र कारबाहीको माग गर्दै युवराज सफलले प्रधानमन्त्री तथा मन्त्रिपरिषद्को कार्यालयमा निवेदन दिएका छन् ।
