धनुषाको क्षीरेश्वरनाथ नगरपालिका १, रम्दैयास्थित वाटरल्यान्ड पार्कमा शनिबार विद्यार्थीबीच झडपसँगै तोडफोड भएको छ।
कक्षा १२ का परीक्षार्थीहरूलाई विशेष छुटमा प्रवेश दिने योजनाअन्तर्गत भीड बढेपछि नुहाउने क्रममा विवाद सिर्जना भएको थियो। विवादले उग्ररूप लिँदै झडप र ढुङ्गामुढासम्म पुगेको प्रहरीले जनाएको छ।
झडपपछि स्थिति नियन्त्रणमा लिन प्रहरीले अश्रुग्यास समेत प्रयोग गरेको छ। हाल पार्क वरिपरि स्थिति तनावग्रस्त भए पनि सुरक्षाकर्मीको उपस्थिति बढाइएको छ।
यसैबीच, पार्कमा तोडफोड तथा झडप गर्ने १० जना विद्यार्थी पक्राउ परेका छन् । विशेष छुटमा नुहाउन पुगेका कक्षा १२ का परीक्षार्थीहरूले तोडफोड गरेका हुन् ।
विद्यार्थीको भिडले सडकमा चल्ने दुईवटा सवारी साधनमा समेत तोडफोड गरेका छन्। पार्कमा लाखौँको क्षति भएको छ । अहिले एकिन विवरण आइसकेको छैन ।
नकपुर-ढल्केवर सडकखण्ड समेत अवरुद्ध गरेर तोडफोड गर्न थालेपछि प्रहरी र विद्यार्थीबीच झडप भएको थियो । झडपको क्रममा प्रहरीले चार सेल अश्रुग्यास प्रहार गरेको जिल्ला प्रहरी कार्यालय धनुषाले जनाएको छ । झडपमा ढुङ्गामुढा लागेर पाँचजना प्रहरी समेत घाइते भएका छन् ।
