जनमत र नागरिक उन्मुक्तिबीच आज पार्टी एकता हुँदै, नयाँ पार्टीको नाम ‘नागरिक जनमत’ रहने

मधेश र सुदूरपश्चिममा सक्रिय जनमत पार्टी र नागरिक उन्मुक्ति पार्टीबीच आज पार्टी एकता हुँदैछ। काठमाडौंमा संयुक्त पत्रकार सम्मेलनमार्फत एकताको औपचारिक घोषणा गरिने छ।

 मंगलबार दुवै पार्टीले आ-आफ्नो केन्द्रीय समिति बैठक गरी एकीकरणको निर्णय गरेका थिए। एकतापछि छैटौं ठुलो शक्ति बन्ने यस पार्टीको नयाँ नाम ‘नागरिक जनमत’ रहनेछ।

पार्टी एकीकरणपछि जनमत अध्यक्ष सीके राउत नयाँ पार्टीको अध्यक्ष हुनेछन् भने नागरिक उन्मुक्तिका संरक्षक रेशम चौधरी संरक्षकको भूमिकामा रहनेछन्। यस्तै, नागरिक उन्मुक्तिकी अध्यक्ष रञ्जिता श्रेष्ठ सहअध्यक्षको जिम्मेवारीमा रहने छिन्।

जनमत पार्टी २०७७ सालमा र नागरिक उन्मुक्ति पार्टी २०७८ सालमा गठन भएका थिए। मधेश तथा सुदूरपश्चिमका सामाजिक-राजनीतिक मुद्दालाई उठाउँदै आएका यी दुई दल अब एउटै मञ्चबाट राजनीति अघि बढाउने भएका छन्।