जम्मु-कश्मीरको पर्यटकीय क्षेत्र पहलगाममा मंगलबार भएको आतंकवादी आक्रमणमा मारिएका नेपालीको पहिचान खुलेको छ ।
परराष्ट्रमन्त्री डा. आरजु राणाका अनुसार उनी रुपन्देहीको बुटवल ११, कालिकानगरका सुदीप न्यौपाने हुन् । यस्तै आक्रमणमा उनकी आमा रेनु पाण्डे घाइते भएको भारतीय सञ्चारमाध्यमले जनाएका छन् ।
उनीहरु घुमघामका लागि त्यहाँ पुगेका थिए । भारतीय सञ्चारमाध्यमले हमलामा मारिनेको संख्या अहिलेसम्म २८ पुगेको उल्लेख गरेका छन् ।
परराष्ट्रमन्त्री राणाले काश्मीरमा आतङ्ककारीको आक्रमणमा परी मृत्यु भएका न्यौपानेको निधनको खबरले आफू निकै मर्माहत भएको उल्लेख गरेकी छन् । उनले मृतकप्रति हार्दिक श्रद्धाञ्जली अर्पण गर्दै परिवारजनमा गहिरो समवेदना व्यक्त गरेकी छन् ।
साथै उनले आतङ्ककारी हमलामा परेर घाइते भएकी उनकी आमाको शीघ्र स्वास्थ्यलाभको कामना गरेकी छन् । यस्तो क्रूर र अमानवीय कार्यको नेपाल सरकारले निन्दा र भर्त्सना गर्दै दु:खद घडीमा भारत सरकार र भारतीय जनताको साथमा रहेको जनाइएको छ ।
