सिरहा, चैत १६ :
सिराहाको औरही गाउँपालिका–५ मा महायज्ञ गर्ने भन्दै दलितको घर भत्काइएको घटनामा पक्राउ परेका औरही गाउँपालिकाका अध्यक्ष शिवजी यादव र पूर्ववडाध्यक्ष दिलीपकुमार यादव धरौटीमा रिहा भएका छन्।
जिल्ला अदालत सिरहाका न्यायाधीश विदुर काफ्लेको इजलासले यादवद्वयलाई जनही एक लाख रुपैयाँ धरौटीमा थुनामुक्त गर्न आदेश दिएको हो। उनीहरूलाई वैशाख १९ मा पुनः हाजिर हुन आदेश दिएको छ। दलित परिवारको घरमा डोजर चलाउने निर्देशन दिने महायज्ञका मूल पुजारी बजरंगी बाबा भने अझै फरार छन्।
१७ चैतदेखि महायज्ञ गर्न भन्दै औरही–५ का दलित दीपक मलिक (डोम) को घर गत १० फागुनमा डोजर लगाएर भत्काइएको थियो। त्यसको सडकदेखि सदनसम्म चर्कोविरोध हुँदै आएको छ ।
