सुक्खा पहिरोले अवरुद्ध बेसीसहर- चामे सडक सञ्चालन 

सुक्खा पहिरो खसेर अवरुद्ध भएको मनाङलाई जोड्ने एक मात्र स्थलमार्ग बेसीसहर- चामे सडक सञ्चालनमा आएको छ ।

सोमबार दिउँसो लमजुङको मर्स्याङ्दी गाउँपालिका- ४ च्याम्चेको अक्टोपस झरना नजिकै बक्स कटिङ क्षेत्रमा सुक्खा पहिरो खसेर सडक अवरुद्ध भएको थियो ।

सडकमा खसेको पहिरो पाँच घण्टाको निरन्तर प्रयासपछि साँझबाट सञ्चालनमा आएको प्रमुख जिल्ला अधिकारी मातृका आचार्यले जानकारी दिए । पहिराले पूर्ण रूपमा बन्द हुँदा आवागमन रोकिएकाले यात्रु, पर्यटक तथा स्थानीयवासी प्रभावित भएका थिए ।

डुम्रे- बेसीसहर- चामे सडक आयोजना कार्यालयका सब-इञ्जिनियर सुमन अधिकारीले स्थानीयवासी, प्रहरी, जिल्ला प्रशासन तथा आयोजनाका कर्मचारीको लामो प्रयासपछि सडक सञ्चालन भएको बताए । उनका अनुसार पहिरो हटाइएपछि सडक अवरोधमा परेका यात्रु गन्तव्यस्थल गएका छन् ।